Published On:Monday, September 15, 2014
Posted by Unknown
(پاکستان ایک ںظر میں) - شمع جلتی رہے تو بہتر ہے
ظلم جتنا بھی طویل ہو جائے آخر انجام کو پہنچ جاتا ہے،خون بہتا ہے تو جم جاتا ہے،اندھیری رات کے بعد روشن صبح نے طلوع ہونا ہی ہوتا ہے۔ طاقت نے بڑے بڑوں کے تیور ٹھیک کردیے،خبر گرم ہے کہ طالبان نے عسکری کارروائیاں بند کرکے تبلیغ شروع کرنے کا اعلان کیا ہے،یہ اعلان ایک عشرے سے نفرت اور بارود کی بو میں گھرے پاکستان کیلئے انعام سے کم نہیں،یہ محبت کا پیغام امن کی جیت کا اعلان ہے۔
امریکہ جب 2001ء میں ہماری مدد سے افغانستان آیا تب سے پاکستان ’’جہنم‘‘
بنا ہوا ہے،ناٹو فوجوں نے ہماری شاہراہوں کو استعمال کیا،دہشتگردوں نے ملک
کے کونے کونے میں دہشت کا کھیل کھیلا،ہزاروں شہریوں کو قتل
کیا،مسجدوں،امام بارگاہوں،گرجا گھروں،گردواروں،مندروں تک کو نہ بخشا،خفیہ
قوتوں نے عسکری اداروں کو ٹارگٹ کیا،جی ایچ کیو ،مہران بیس،کامرہ
اےئربیس،نیوی ڈاکیارڈ پر حملے ہوئے،دو مئی ایبٹ آباد آپریشن ہوا،فوجی
جوانوں کو اغواء کیا گیا،حملوں میں شہید کیا گیا،ایک منصوبے کے تحت
لسانیت،علاقائیت کو فروغ دے کر ملک کو ماتم کدہ بنایا گیا،پاکستان کو ناکام
ریاست ثابت کرنے کیلئے ہر چال چلی گئی،ہر مہرہ استعمال کیا گیا،اس جنگ کی
صورت پاکستان نے 2002ء سے 2013ء تک باون ہزار سے زائد افراد کی جانیں قربان
کیں،پاکستان نے معاشی،معاشرتی ہر سطح پر نقصانات اٹھائے ہیں۔
شمالی وزیرستان میں ضربِ عضب کے نام سے فوجی کارروائی پوری آب و تاب سے جاری ہے،آخری
اطلاعات تک 910 دہشتگرد ہلاک ہوچکے ہیں،جن میں زیادہ تعداد غیرملکیوں کی
ہے،آئی ایس پی آر کے مطابق کھجوری، میرعلی، میران شاہ، دتہ خیل روڈ اور
گھریوم جھالر روڈ کو محفوظ بنایا جا چکا ہے،اس کے علاوہ فوج نے میرعلی، دتہ
خیل، بویا اور دیگان قصبوں کو بھی عسکریت پسندوں سے خالی کروا لیا ہے۔اب
تک27 بم ساز فیکٹریاں، اور ایک ایک راکٹ اور ایمونیشن فیکٹری بھی تباہ کی
گئی ہے، جب کہ عسکریت پسندوں کے زیرِ استعمال مواصلاتی ساز و سامان، اسلحہ
اور گاڑیاں قبضے میں لے لی گئی ہیں۔اب تک آپریشن ضرب عضب کے دوران 82 فوجی
شہید ہوئے ہیں جب کہ 269 زخمی ہیں۔
آپریشن ضرب عضب کا فیصلہ پاکستان کیلئے رحمت ثابت ہورہا ہے،پورے
پاکستان میں دہشتگردی کے واقعات میں کمی آئی ہے،ملک امن کا گہوارا بنتا جا
رہا ہے،ایسے لگتا ہے کہ زندگی ایک بار پھر لوٹ آئی ہے،کل کے بگڑے سدھرنے
لگے ہیں،امن کے پھول کھلنے لگے ہیں،جنگ کسی مسئلے کا حل نہیں،خود ایک مسئلہ
ہے،ساحر لدلدھیانوی اس بارے بہت پہلے کہ گئے ہیں کہ
خون اپنا ہو یا پرایا ہو
نسل آدم کا خون ہے آخر
جنگ مشرق میں ہو کہ مغرب میں
امن عالم کا خون ہے آخر
بم گھروں پر گریں کہ سرحد پر
روحِ تعمیر زخم کھاتی ہے
کھیت اپنے جلیں کہ اوروں کے
زیست فاقوں سے تلملاتی ہے
ٹینک آگے بڑھیں کہ پیچھے ہٹیں
کوکھ دھرتی کی بانجھ ہوتی ہے
فتح کا جشن ہو کہ ہار کا سوگ
زندگی میتوں پہ روتی ہے
جنگ تو خود ہی ایک مسئلہ ہے
جنگ کیا مسئلوں کا حل دے گی
آگ اور خون آج بخشے گی
بھوک اور احتیاج کل دے گی
اس لئے اے شریف انسانو!
جنگ ٹلتی رہے تو بہتر ہے
آپ اور ہم سبھی کے آنگن میں
شمع جلتی رہے تو بہتر ہے
About the Author
Abdul Hakeem Khagga - I'm a Digital Marketer , Web Designer and Auditor by profession. I love to write and explore different things and share my experiences with people. I like honest and loyal people around me.